اے وادیٗ کشمیر! اے وادئ کشمیر...
تو حسن کا پیکر ہے،تو رعنائی کی تصویر
مخمور بہاروں کے حسین خوابوں کی تعبیر
رخشاں ہیں تیرے ماتھے پہ آنادی کی تنویر
تو جلوہ گہ نور جہان،قلب ِ جہانگیر
اے وادیٗ کشمیر،اے وادیٗ کشمیر
ہر لمحہ مچلتی ہیں تیرے من میں بہاریں
میخانہ در آغوش درختوں کی قطاریں
چشموں کے ترانے ہیں کہ ساون کی ملہاریں
ندیوں میں تری نغمہ آزادی کی تفسیر
اے وادیٗ کشمیر،اے وادیٗ کشمیر
کیوں تری فضاوٗں میں اداسی کے نشان ہیں
نکھرے ہوئے گلزار بھی کیوں محو فغاں ہیں
چشمے ترے کیوں نالہ کش ونوحہ کناں ہیں
کہسار ترے کیوں ہیں جگر بستہ ودلگیر
اے وادیٗ کشمیر،اے وادیٗ کشمیر
شاید تجھے مسلم کی وفاوٗں سے گلا ہے
فریاد تری سچ ہے،ترا شکوہ بجا ہے
لیکن میرے محبوب وہ وقت آن لگا ہے
گونجے گا فضاوٗں میں جب اک نعرہ تکبیر
اے وادیٗ کشمیر،اے وادیٗ کشمیر
مانا کہ دلوں میں وہ تب وتاب نہیں ہے
اس قوم کی تلوار میں وہ آب نہیں ہے
اب عزمِ مسلمان وہ سیلاب نہیں ہے
گردش میں ہے برسوں سے مری قوم کی تقدیر
اے وادیٗ کشمیر،اے وادیٗ کشمیر
مانا تری مٹی پہ بہت خون بہا ہے
تو نے غم وآلام غلامی کو سہا ہے
لیکن مرے ہمدم!مرا دل بول رہا ہے
ہمت کی حرارت سے پگھل جائے گی زنجیر
اے وادیٗ کشمیر،اے وادیٗ کشمیر
تکبیر کا نعرہ تری عصمت کا امیں ہے
چھٹنے کو ہے تاریکیٗ غم،مجھ کو یقین ہے
کیا ظلمت ِ شب صبح کی تمہید نہیں ہے؟
کیا خونِ شفق رنگ نہیں مثردہٗ تنویر؟
اے وادیٗ کشمیر،اے وادیٗ کشمیر
اب وقت ہے سینوں میں عزائم کو جگا لیں
ہم جام و سبوتوڑ کے تلوار اٹھالیں
ہر راہ گلستان کو کمیں گاہ بنا لیں
کمزور ہیِِ، لیکن ابھی ٹوٹی نہیں شمشیر
اے وادیٗ کشمیر،اے وادیٗ کشمیر
ہیں یاد ابھی تک خالد ؓ وطارقؒ کے فسانے
کچھ دور نہیں احمد ؒ و ٹیپو ؒ کے زمانے
اٹھو ، کہ چلیں ظلم کو دنیا سے مٹانے
پھر زندہ کریں دہر میں یہ اسوہ شبیر
اے وادیٗ کشمیر،اے وادیٗ کشمیر
ہم کو ترے شاداب نظاروں کی قسم ہے
جہلم کے دلآویز کناروں کی قسم ہے
پھولوں کی ،درختوں کی چناروں کی قسم ہے
کاٹیں گے ترے پاوٗں سے ہر ظلم کی زنجیر
اے وادیٗ کشمیر،اے وادیٗ کشمیر
سر حرمت ِ توحید پہ کٹوا کے رہیں گے
ہم کفر کے طوفان سے ٹکرا کے رہیں گے
طاغوت کے ایوان کو اب ڈھا کے رہیں گے
پیوند ِ زمین ہو گی ہر اک کفر کی تعمیر
اے وادیٗ کشمیر،اے وادیٗ کشمیر
اک غلغلہ ،نعرہ تکبیر اٹھا کر
یہ برقِ تپاںخرمن ِباطل پہ گرا کر
توپوں سے برستے ہوئے شعلوں میں نہا کر
ہم خون سے لکھیں گے تری آزادی کی تحریر
اے وادیٗ کشمیر،اے وادیٗ کشمیر
دشمن کے عزائم تیری مٹی میں ملیں گے
مدت سے جو رستے ہیں ،ترے زخم سلیں گے
اس خاک یہ الفت کے حسیں پھول کھلیں گے
صیاد جو اب تک تھا وہ بن جائے گا نخچیر
اے وادیٗ کشمیر،اے وادیٗ کشمیر
پھوٹیں گے تری خاک سے پھر نور کے دھارے
ظلمت کدہ کفر سے اٹھیں گے شرارے
گونجے گی آذانوں کی صدا ڈل کے کنارے
پھر جاگ اٹھے گی تری سوئی ہوئی تقدیر
اے وادیٗ کشمیر،اے وادیٗ کشمیر
تو خاتم ِ دنیا کا اک انمول نگیں ہے
تو حسن کا مسکن ہے ،تو بہاروں سے حسیں ہے
آسی کی نگاہوں میں تو فردوسِ بریں ہے
فردوس تو ہوتی نہیں ،شیطان کی جاگیر
اے وادیٗ کشمیر،اے وادیٗ کشمیر
یہ ولولہ انگیز نظم استاذ محترم حضرت شیخ الاسلام مفتی محمد تقی عثمانی دامت برکاتہم نے جون 1965 میں تحریر فرمائ تھی.
مبارك باد حجاج کرام
لَبَّيْكَ اللَّهُمَّ لَبَّيْكَ، لَبَّيْكَ لاَ شَرِيكَ لَكَ لَبَّيْكَ، إِنَّ الْحَمْدَ، وَالنِّعْمَةَ، لَكَ وَالْمُلْكَ، لاَ شَرِيكَ لَك۔۔
یہ حج و زیارت مُبارک ہو تم کو
متاع سعادت مُبارک ہو تم کو
وہ ہر سمت انوار، ہر سو تجلی
وہ نور ہدایت مُبارک ہو تم کو
وہ احرام میں مست و سرشار رہنا
غموں سے فراغت مُبارک ہو تم کو
اذان سحر کا حرم میں وہ منظر
وہ کیف سماعت مُبارک ہو تم کو
مُبارک ہوں وہ ملتزم پر دُعائیں
وہ ذوق عبادت مُبارک ہو تم کو
وہ میزاب رحمت کے نیچے نمازیں
بشوق اطاعت مُبارک ہو تم کو
مُبارک ہوں وہ سنگ اَسود کے بوسے
لبوں کی حلاوت مُبارک ہو تم کو
وہ رکن یمانی پہ ہر دم تجلی
وہ آثار رحمت مُبارک ہو تم کو
وہ پی پی کے زم زم سیراب ہونا
وہ کوثر کی لذت مُبارک ہو تم کو
منٰی میں رمی کا وہ پر کیف منظر
وہ جلووں کی کثرت مُبارک ہو تم کو
وہ عرفات میں خیمہ زن ہوکے رہنا
بَزُہد و قناعت مُبارک ہو تم کو
کلام: ﴿محمد زکی کیفی﴾
نعتِ رسولِ مقبول ﷺ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پکاروں گا ہر آن ختمِ نُبوّت
مِرا دین و ایمان ختمِ نبوّت
........................................
نبی ﷺ کا دیوانہ کہے یہ زمانہ
مِری تو ہے پہچان ختمِ نُبوّت
............................................
شِفاعت کا حقدارکیونکر نہ ہو وہ
کرے گا جو اعلان ختمِ نُبوّت
...............................................
فقط ایک میں ہی نہیں بلکہ اک دن
کہے گا ہر انسان ختمِ نُبوّت
................................................
محمد ﷺ خدا کے ہیں محبوب پیارے
ملا رتبہ ذیشان ختمِ نُبوّت
..............................................
کہ بعد از محمدؐ نہ کوئی پیمبرؑ
خدا کا ہے فرمان ختمِ نُبوّت
...............................................
کروڑوں ہوئے وارثانِ پیمبرؑ
محمد ﷺ کا فیضان ختمِ نُبوّت
................................................
صداقت نے لفظوں کے بوسے لیے ہیں
چھِڑا جونہی عنوان ختمِ نُبوّت
..............................................
ُُُُنُبوّت کے رتبے حسیں تر ہیں صائم
مگر سب میں سلطان ختمِ نُبوّت
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ملک مبشر صائم علوی
عارفانہ کلام
فقیہ العصر مفتی محمد تقی عثمانی صاحب مد ظلہ العالی کا عارفانہ کلام
❶ محبت کیا ہے دل کا درد سے معمور ہوجانا
متاعِ جاں کسی کو سونپ کر مجبور ہوجانا
قدم ہے راہِ الفت میں تو منزل کی ہوس کیسی؟
یہاں تو عین منزل ہے تھکن سے چور ہوجانا
یہاں تو سر سے پہلے دل کا سودا شرط ہے یارو!
کوئی آسان ہے کیا سرمد و منصور ہوجانا
بسا لینا کسی کو دل میں دل ہی کا کلیجا ہے
پہاڑوں کو تو بس آتا ہے جل کر طور ہوجانا
نظر سے دور رہ کر بھی تقی! وہ پاس ہے میرے
کہ میری عاشقی کو عیب ہے مہجور ہوجانا
❷ حرم کی مقدس فضاؤں میں گم ہوں
میں جنت کی ٹھنڈی ہواؤں میں گم ہوں
میں بے گانہ ہوکر ہر اک ماسوا سے
بس اک آشنا کی وفاؤں میں گم ہوں
زبانیں جہاں گنگ ہیں ، لفظ ششدر
تحیر کی ایسی فضاؤں میں گم ہوں
میں کعبے کے بے آب و رنگ پتھروں سے
کرم کی امڈتی گھٹاؤں میں گم ہوں
کبھی سنگِ اسود کی کرنوں سے حیراں
کبھی ملتزم کی دعاؤں میں گم ہوں
مقفل ہے در ، لٹ رہے ہیں خزانے
عطا کی نرالی اداؤں میں گم ہوں
ہر اک دل سے ظلمت کے دل چھٹ رہے ہیں
غلافِ سیہ کی ضیاؤں میں گم ہوں
جو میرے گناہوں کو بھی دھو رہی ہے
میں رحمت کی ان انتہاؤں میں گم ہوں
یہ میزابِ رحمت پہ پُر درد نالے
فلک سے برستی عطاؤں میں گم ہوں
یہ زمزم کے چشمے ، یہ پیاسوں کے جمگھٹ
زمیں سے ابلتی شفاؤں میں گم ہوں
جو اس آستاں کے لگاتے ہیں پھیرے
میں ان کے جنوں کی اداؤں میں گم ہوں
کھڑے ہیں بھکاری ترے در کو تھامے
میں ان کی بلکتی صداؤں میں گم ہوں
یہ سینے سے اٹھتی ندامت کی آہیں
میں ان دردِ دل کی دواؤں میں گم ہوں
یہ کعبے کے درباں ، یہ نازوں کے پالے
میں ان کی پیاری جفاؤں میں گم ہوں
تصور میں یادوں کی محفل سجی ہے
تخیل کی دلکش خلاؤں میں گم ہوں
ابھی شرحِ الفت کی منزل کہاں ہے
ابھی تو تقی! ابتداؤں میں گم ہوں
❸ الہٰی! تیری چوکھٹ پر بھکاری بن کے آیا ہوں
سراپا فقر ہوں ، عجز و ندامت ساتھ لایا ہوں
بھکاری وہ کہ جس کے پاس جھولی ہے نہ پیالہ ہے
بھکاری وہ جسے حرص و ہوس نے مارڈالا ہے
متاعِ دین و دانش نفس کے ہاتھوں سے لٹواکر
سکونِ قلب کی پونجی ہوس کی بھینٹ چڑھوا کر
لٹاکر ساری پونجی غفلت و عصیاں کی دلدل میں
سہارا لینے آیا ہوں ترے کعبے کے آنچل میں
گناہوں کی لپٹ سے کائناتِ قلب افسردہ
ارادے مضمحل ، ہمت شکستہ ، حوصلے مردہ
کہاں سے لاؤں طاقت دل کی سچی ترجمانی کی
کہ کس جنجال میں گزری ہیں گھڑیاں زندگانی کی
خلاصہ یہ کہ بس جل بھن کے اپنی روسیاہی سے
سراپا فقر بن کر اپنی حالت کی تباہی سے
ترے دربار میں لایا ہوں اب اپنی زبوں حالی
تری چوکھٹ کے لائق ہر عمل سے ہاتھ ہے خالی
تری چوکھٹ کے جو آداب ہیں میں ان سے خالی ہوں
نہیں جس کو سلیقہ مانگنے کا وہ سوالی ہوں
یہ تیرا گھر ہے ، تیرے مہر کا دربار ہے مولیٰ!
سراپا نور(/مہر )ہے اک مہبطِ انوار ہے مولیٰ!
یہ آنکھیں خشک ہیں یارب! انھیں رونا نہیں آتا
سلگتے داغ ہیں دل میں جنھیں دھونا نہیں آتا
زباں غرقِ ندامت دل کی ناقص ترجمانی پر
خدایا رحم میری اس زبانِ بے زبانی پر
❹ مجھے زندگی میں یارب! سربندگی عطا کر
مرے دل کی بے حسی کو ، غمِ عاشقی عطا کر
ترے درد کی چمک ہو ، تری یاد کی کسک ہو
مرے دل کی دھڑکنوں کو ، نئی بے کلی عطا کر
جو تجھی سے لو لگادے ، جو مجھے میرا پتا دے
میرے عہد کی زباں میں ، مجھے گم رہی عطا کر
میں سفر میں سو نہ جاؤں ، میں یہیں پہ کھو نہ جاؤں
مجھے ذوق و شوقِ منزل کی ہمہ ہمی عطاکر
بڑی دور ہے ابھی تک ، رگِ جان کی مسافت
جو دیا ہے قرب تو نے ، تو شعور بھی عطاکر
بھری انجمن میں رہ کر ، نہ ہو آشنا کسی سے
مجھے دوستوں کے جھرمٹ میں وہ بے کسی عطاکر
کہیں مجھ کو ڈس نہ جائیں یہ اندھیرے بجلیوں کے
جو دلوں میں نور کردے وہی روشنی عطا کر
مجھے تیری جستجو ہو ، مرے دل میں تو ہی تو ہو
مرے قلب کو وہ فیضِ درِ عارفی عطا کر
❺ دربار میں حاضر ہے ۔۔۔ اک بندۂ آوارہ
آج اپنی خطاؤں کا ۔۔۔ لادے ہوئے پشتارا
سرگشتہ و درماندہ ۔۔۔ بے ہمت و ناکارہ
وارفتہ و سرگرداں۔۔ بے مایہ و بے چارہ
شیطاں کا ستم خوردہ ۔۔ اس نفس کا دکھیارا
ہر سمت سے غفلت کا ۔۔۔ گھیرے ہوئے اندھیارا
دربار میں حاضر ہے ۔۔۔ اک بندۂ آوارہ
آج اپنی خطاؤں کا ۔۔۔ لادے ہوئے پشتارا
جذبات کی موجوں میں ۔۔۔ لفظوں کی زباں گم ہے
عالم ہے تحیر کا ۔۔۔ یارائے بیاں گم ہے
مضمون جو سوچا تھا ۔۔۔ کیا جانے کہاں گم ہے
آنکھوں میں بھی اشکوں کا ۔۔۔ اب نام و نشاں گم ہے
سینے میں سلگتا ہے ۔۔۔ رہ رہ کے اک انگارہ
دربار میں حاضر ہے ۔۔۔ اک بندۂ آوارہ
آج اپنی خطاؤں کا ۔۔۔ لادے ہوئے پشتارا
آیا ہوں ترے در پر ۔۔۔ خاموش نوا لے کر
نیکی سے تہی دامن ۔۔۔ انبارِ خطا لے کر
لیکن تری چوکھٹ سے ۔۔۔ امیدِ سخا لے کر
اعمال کی ظلمت میں ۔۔۔ توبہ کی ضیا لے کر
سینے میں تلاطم ہے ۔۔۔ دل شرم سے صدپارہ
دربار میں حاضر ہے ۔۔۔ اک بندۂ آوارہ
آج اپنی خطاؤں کا ۔۔۔ لادے ہوئے پشتارا
امید کا مرگز ہے ۔۔۔ رحمت سے بھرا گھر ہے
اس گھر کا ہر اک ذرہ ۔۔۔ رشکِ مہ و اختر ہے
محروم نہیں کوئی ۔۔۔ جس در سے یہ وہ در ہے
جو اس کا بھکاری ہے ۔۔۔ قسمت کا سکندر ہے
یہ نور کا قلزم ہے ۔۔۔ یہ امن کا فوّارہ
دربار میں حاضر ہے ۔۔۔ اک بندۂ آوارہ
آج اپنی خطاؤں کا ۔۔۔ لادے ہوئے پشتارا
یہ کعبہ کرشمہ ہے ۔۔۔ یارب تری قدرت کا
ہر لمحہ یہاں جاری ۔۔۔ میزاب ہے رحمت کا
ہر آن برستا ہے ۔۔۔ دھن تیری سخاوت کا
مظہر ہے یہ بندوں سے ۔۔۔ خالق کی محبت کا
اس عالم پستی میں ۔۔۔ عظمت کا یہ چوبارا
دربار میں حاضر ہے ۔۔۔ اک بندۂ آوارہ
آج اپنی خطاؤں کا ۔۔۔ لادے ہوئے پشتارا
یارب! مجھے دنیا میں ۔۔۔ جینے کا قرینہ دے
میرے دلِ ویراں کو ۔۔۔ الفت کا خزینہ دے
سیلابِ معاصی میں ۔۔۔ طاعت کا سفینہ دے
ہستی کے اندھیروں کو ۔۔۔ انوارِ مدینہ دے
پھر دہر میں پھیلادے ۔۔۔ ایمان کا اجیارا
دربار میں حاضر ہے ۔۔۔ اک بندۂ آوارہ
آج اپنی خطاؤں کا ۔۔۔ لادے ہوئے پشتارا
یارب میری ہستی پر ۔۔۔ کچھ خاص کرم فرما
بخشے ہوئے بندوں میں ۔۔۔ مجھ کو بھی رقم فرما
بھٹکے ہوئے راہی کا ۔۔۔ رخ سوئے حرم فرما
دنیا کو اطاعت سے ۔۔۔ گلزارِ ارم فرما
کردے میرے ماضی کے ۔۔۔ ہر سانس کا کفارہ
❻ حضرت مفتی صاحب کے پردرد اشعار جو غالبا انھوں نے اپنے والد صاحب مفتی محمد شفیع عثمانی صاحب نور اللہ مرقدہ کی وفات کے موقع پر کہے ہیں:
کیوں تیرہ و تاریک ہے نظروں میں جہاں آج
کیوں چھائے ہیں ہر سمت یہ ظلمت کے نشاں آج
یوں برق و شرر نے مرا پھونکا ہے نشیمن
باقی ہے کوئی شاخ ، نہ تنکوں کا نشاں آج
اب زیست کا ہر مرحلہ نظروں میں کٹھن ہے
گرداب بلا خیز ہے یہ نہر رواں آج
دل میں وہ تلاطم ہے کہ ہلچل سی مچی ہے
اور آنکھ ہے ظالم کہ بس اک خشک کنواں آج
دنیا ہے مرے دوستو! مٹی کا گھروندا
اور زندگی اک کارگہِ شیشہ گراں آج
جو مرکزِ الفت تھے ، جو گلزارِ نظر تھے
ہیں خاک کا پیوند وہ اجسامِ بتاں آج
ناگاہ کوئی دم میں ہی لد جائے گا ڈیرا
دھوکے ہیں یہ سب ، جن پہ ہے منزل کا گماں آج
عارفانہ اشعار
جس سے ہیں آپ خوش اس جہاں میں
وہ شب وروز ہے گلستاں میں
دیکھ کر میرے اشک ندامت
ابرِ رحمت کی بارش ہے جاں میں
آپ کاسنگ در اور میرا سر
حاصل زندگی ہے جہاں میں
سارے عالم کی لذت سمٹ کر
آگئ ہے تیرے آستاں میں
از: ارشادات درد دل مجددزمانہ حضرت مولانا شاہ حکیم محمداحتر صاحب نوراللّٰه مرقدہ
کوئی تبصرے نہیں:
ایک تبصرہ شائع کریں